ရန်ကုန်ကိုနေဖြစ်ပြီး သိပ်မကြာခင်မှာပဲ နာနတ်တောလမ်းက ပြည်ရိပ်မွန်အိမ်ရာကို ပြောင်းပြီးနေဖြစ်ပါတယ်။ အဲဒီပြည်ရိပ်မွန်အိမ်ရာရဲ့ နာနတ်တောလမ်းဟိုဖက်ခြမ်းမှာ ကစားကွင်းကြီးရှိပါတယ်။ အဲဒီတုန်းကပါ။ ကစားကွင်းမှာ ဘောလုံးကန်လို့ရတယ်။ ဂိုးတိုင်နှစ်ဖက်လုပ်ထားပါတယ်။ ဒန်းစီးစရာရှိတယ်။ ဆီးဆောရှိတယ်။ ကွင်းကတော်တော်ကျယ်တော့ ညနေ ညနေဆို ရပ်ကွက်ထဲက ကလေးတော်တော်များများ အဲဒီကွင်းထဲမှာ ဆော့ပါတယ်။ ထူးထူးခြားခြား ဂေါက်သီးရိုက်ကျင့်နေတဲ့ အန်ကယ်ကြီးတစ်ယောက်တောင်ရှိပါတယ်။ သူများတွေ အန္တရာယ်မဖြစ်အောင် သူ့ဟာသူ ဖြေးဖြေးရိုက်နေတာပါ။
ခုနှစ်တော့ အတိအကျမမှတ်မိပါဘူး။ နာဂစ်မဖြစ်ခင်မှာ အဲဒီကွင်းကြီးကို တစ်ခြမ်းခြမ်းပြီးတော့ ဟိုဖက်ခြမ်းမှာ ဂေါက်သီး အဝေးရိုက်လေ့ကျင့်တဲ့ဟာ ဖွင့်ပါတယ်။ တစ်ဝက်ပဲကျန်တဲ့ကွင်းမှာပဲ ကလေးတွေ ဂိုးကျင်းကန်ကြ၊ စက်ဘီးစီးကြနဲ့ပါ။
နာဂစ်ဝင်ပါတယ်။
နာဂစ်ဝင်အပြီး ရန်ကုန်မှာ သစ်ပင်ကြီးတော်တော်များများ လဲပါတယ်။ လဲတဲ့သစ်ပင်ကြီးတွေရဲ့ ပင်စည်လောက်ကနေ အမြစ်ထိဖြတ်ပြီး အဲဒီ ဘောလုံးကွင်းတစ်ဝက်ထဲမှာ လာထားပါတယ်။ အဲဒီအချိန်ကစလို့ ကလေးတွေ ကစားတဲ့နေရာ ပျောက်သွားတာပါ။ အဲဒီသစ်မြစ်တွေ ၀ယ်လို့ရတယ်လို့သိရပါတယ်။ အဲဒီကွင်းနဲ့နာနတ်တောလမ်းဘေးမှာ တိုက်တန်းသစ်တွေရှိပါတယ်။
အခုတစ်ခေါက်ရန်ကုန်ရောက်တော့ အဲဒီနေရာကိုရောင်းလိုက်ပြီလို့သိရပါတယ်။ ခုနကပြောတဲ့ တိုက်တန်းတွေလည်း ဖယ်ပေးရမယ်ဆိုပါတယ်။
ကလေးတွေရဲ့ ကစားကွင်းနေရာ တဖြည်းဖြည်းပျောက်သွားတာ ကျွန်တော်နှမျောလိုက်တာဗျာ။
No comments:
Post a Comment